नाशिक महसूल विभागात कार्यरत असलेल्या महसूल क्षेत्रीय स्तरावरील विविध संवर्गातील अधिकारी व कर्मचारी यांना प्रशिक्षण देण्यासाठी दिनांक 10/8/2006 रोजी “नाशिक महसूल प्रशिक्षण प्रबोधिनी, नाशिक” ही संस्था स्थापन करण्यात आली. त्यानंतर राज्य शासन सेवेत सर्व स्तरावर कार्यक्षमता वाढवून गतीमान प्रशासनाची संकल्पना साध्य करण्यासाठी तसेच आर्थिक, सामाजिक, राजकीय व तांत्रीक बदलामुळे निर्माण होणाऱ्या आव्हानांना सामोरे जाणे व प्रशासनामध्ये बदलासाठी आवश्यक असणारी लवचिकता साध्य करणे, याबाबत सर्व स्तरावर प्रशिक्षण देण्याची गरज विचारात घेऊन दिनांक 23/9/2011 रोजी “महाराष्ट्र राज्याचे प्रशिक्षण धोरण” निश्चित करण्यात आले. विभागीय मुख्यालयाच्या स्तरावर प्रशिक्षण विषयक कामकाज पार पाडण्यासाठी दि.14/10/2013 अन्वये नाशिक महसूल प्रशिक्षण प्रबोधिनी, नाशिक या संस्थेस “विभागीय प्रशासकीय प्रशिक्षण संस्था, नाशिक” म्हणून घोषित करण्यात आले. त्यास अनुसरुन यशदा, पुणे यांच्या अंतर्गत व मार्गदर्शनाखाली राज्यातील व विशेषत: नाशिक महसूल विभागातील राज्य शासकीय गट-ब संवर्गातील अधिकारी आणि गट-क संवर्गातील कर्मचारी यांच्याकरीता पायाभूत, पदोन्नती पश्चात व उजळणी या स्वरुपाचे प्रशिक्षण वर्ग या संस्थेत आयोजित करण्यात येतात.